منتديات صدفه


الربابة(عبد الرحيم منصور)

اذهب الى الأسفل

الربابة(عبد الرحيم منصور)

مُساهمة من طرف GABAROT RAGOL في الإثنين يونيو 01, 2009 9:32 am

( شدى رباب(1) العيون ))

نعس الحمام وفرش مناديله

وسمح لنا نغنى له

وغلى فى قعر الزيت قنديله

شدى الرباب .. واللى يكون بكره يهون

وإيه راح يكون

غيرش الحنان يقلع هلاهيله

يبدر فى قلبى سنبله ونباله

وطريق .. وفجر ملفح الرحاله

وأنا الكتوم .. ناديت فى سرى للرباب مسمعشى

وبعلو حسى نفسى أغنيله

نعس الحمام وفرش مناديله

وسمح لنا حبه نغنى له

أنا كنت فين وأنتى

أنا كنت اعمى .. قبل ما بنتى

لو كنت أعرف فيه قلوب صابحه

بتلون الفجريه بالفرحه

لو كنت أعرف

المهم انا قلبى

عمره ما مات

لجان ما يسقى الطرحه

بالدم والدمعات

ونهودها زنزانه

دراعاتها سجانه

وعيونها كانت م الحرام حبلى ومليانه

معلهش حادفن كل حى ومات

جانى حبيبى مسرجه خيله

نعس الحمام وفرش مناديله

وسمح لنا حبه نغنى له

يا ام العيون لون أى شئ يحلالك

قول خضرا قول

لون المراوى والحقول

قول سندسيه مسندسه

قول فيروزيه

قول الطفوله وهيه طالعه المدرسه

قول العبيد

لابسه الشاشات البيضا ، قول لون الجريد

لون العتاب

قول العتاب

فوق الرباب .. لما بأغنيله الصبيه يفتح الأبواب

كحلت عينى بعينها .

ضمتنى .. ضمتها

إتفرفط الرمان على بزتينها حبايه .. حبايه

وكل حبه وليد

غنى لها

غنى لنا

وغناه بيحلالنا

وعشقنا

عشقتنى

سكرت بعرف الأرض .. سكرتنى

مات فيها كل قديم

مات فيا كل قديم

ونزلنا بير

وطلعنا بير

من ندعة البير الدفين .. سقتنى .. شدتنى

شديت قلوعى .. وشفتيها معايا

زغرد ما بيا كل حي حزين

وأي وقت حزين

بيجي حبيبي

وحتى شوف لما با أناديله

جانى حبيبى مسرجه خيله

نعس الحمام وفرش مناديله

وسمح لنا حبه نغنى له

ـــ احلم معايا بورده

احلم معايا وطير

خد بزتينى مخده

وسدرى برضه سرير

إن كان غريمك قديمى

يبقى قديمك غريمى

ـــ مات فيه كل قديم

ـــ تعالى نحلم .. ونحلم

نغنى غنوة وليده

زى الوليد لما يصرخ

نكتبها اسم القصيده

دنا بنت همس الشفايف

ـــ وانا ابن شمس المراود

وأمى فى النيل جابتنى

ـــ جنيه ..

ـــ لا .. النيل شمطنى (2) بدراعه

ولفنى بشراعه

وابويا هوه اللى غاتنى

ـــ ابوكى لازم مراكبى

ـــ مدراش انا مدراش

ده كله ميهمناش

احلم معايا يا راجل

ـــ قلبى بيغلى .. بيغلى

بيغلى زى المراجل (3)

تعالى اشمك واضمك

وأبل ريقى بدمك

ـــ قلبك مراجل بتغلى

تعالى نرقص يا خلى

ـــ هئ يا سلام افتكرت

زى الغوازى فى بلدنا

ـــ رقص العصا

ـــ لا يا شابه

رقص البزاز ع الحصى

ـــ يا حلو يا مصرى

أزرع فى عيونك ديه

ـــ ميل وانتفض بصريخ

وأملانى بالتفريخ

ـــ يا ام البزاز بنيه

غنا حمامك غيه

ـــ حاسس

ـــ يابوى حاسس

نفسك رجال

بتلعب النبابيت فى أنفاسى وأنا ناعس

ـــ طب كنت فين من زمان ؟؟

لو كان غريمك قديمى

يبقى قديمك غريمى

ـــ مات فيه كل قديم

وبكره تصبح غريم

ومرضه حاصبح غريمه

1965

(1) الرباب : السحاب الأبيض

(2) شمط : اختلط سواده ببياضه ، أى شاخ

(3) المراجل : جمع ( مارج ) وهى الشعله ذات اللهب الشديد

GABAROT RAGOL

Nick Name : جـٍـٍـٍـٍـٍبـٍـٍـٍـٍرٍوٍتٍ رٍاجـٍـٍـٍـٍـٍـٍـٍـٍلٍ
عدد المساهمات : 164
تاريخ التسجيل : 29/05/2009
رساله sms رساله sms : لم يقم هذا العضو بإنشاء ال sms الخاصه به

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى